Францускиот претседател Емануел Макрон го претстави „историскиот план“ за помош од 8 милијарди евра за производителите на автомобили загрозени од последиците од пандемијата со коронавирусот.
Овие пари треба да се искористат за модернизација на овој сектор од француската индустрија и земјата да стане предводник во производството на електрични автомобили.
„Државата ќе даде нешто повеќе од 8 милијарди евра за овој сектор“, вети Макрон за време на посетата на фабрика за автоделови во северна Франција.
Макрон рече дека целта е со оваа помош Франција да стане прва земја во Европа по производство на „чисти автомобили“ во наредните пет години, со повеќе од 1 милион произведени електрични и хибридни автомобили годишно.
Макрон најави зголемување на „еколошките субвенции“ за купување електрични возила на 7.000 евра за граѓаните и 5.000 евра за компании, како и субвенции од 2.000 евра за возила на хибриден погон.
Од гигантот Renault побара „гаранции“ за иднината на вработените во две фабрики чија судбина е неизвесна. Нагласи дека државниот кредит од 5 милиони евра за Renault „не може да биде одобрен“ пред исходот од преговорите во овие фабрики. Преговорите се очекуваат следната недела.