УЕФА го предупреди Манчестер Сити дека постои можност одново да ја отвори истрагата од 2014 година во која англискиот клуб беше обвинет за прекршување на Финансискиот фер-плеј. Документите и мејловите кои ги откри платформата Football Leaks за Манчестер Сити во последните две недели укажуваат на сериозни финансиски нерегуларности и прекршување на правилата на европската куќа на фудбалот.
Челниците на УЕФА во 2014 година започнаа истрага против Манчестер Сити и го казнија клубот со парична казна од 49 милиони евра поради прекршување на Финансискиот фер-плеј, но документите откриени од Football Leaks и објавени на Der Spiegel покажуваат дека англискиот шампион не само што го крши ФФП туку и има еден куп нерегуларности во финансиското работење.
Во официјална изјава за медиумите, УЕФА напомена дека внимателно го следи финансиското работење на сите европски клубови и дека според нивните податоци Манчестер Сити немал никакви нерегуларности го полето на ФФП. Сепак, напоменаа дека доколку бидат изнесени конкретни и веродостојни податоци, одново ќе ја започнат истрагата.
„Ако излезат нови информации кои укажуваат дека претходната истрага не ги открила сите нерегуларности на Манчестер Сити, тогаш истиот случај може да биде одново отворен и ќе се прошири истрагата на сите полиња“, стои во извештајот на УЕФА.
Раководството на шпанската Ла Лига побара да продолжи истрагата за финансиското работење на ПСЖ и Манчестер Сити, а УЕФА веќе поминува низ документите на францускиот клуб со цел да одреди дали тие го прекржиле ФФП во последните четири години.
