Двајцата поранешни соиграчи на прерано починатиот Синиша Михајловиќ на денешниот погреб беа меѓу оние кои го носеа ковчегот со неговите посмртни останки.
Михајловиќ почина од леукемија во петокот, а денеска во Рим беше неговиот погреб. Присуствуваа многу негови пријатели од светот на фудбалот, соиграчи, но и противници.
Франческо Тоти синоќа го гледаше мундијалското финале помеѓу Аргентина и Франција, а потоа пристигна во Рим за да му одаде последен поздрав на својот поранешен лут ривал од редовите на Лацио. Интересно, но Тоти и Михајловиќ имаат и една сезона играно заедно. Имено, кога Синиша дојде во Серија А во 1992 година, прв клуб му беше Рома. Тоти тогаш беше во младинскиот погон, а наредната сезона 1993/1994 ја одиграа заедно.
Помеѓу шестмината кои го носеа ковчегот со телото на мајсторот за слободни удари, беа и двајца негови долгогодишни поранешни соиграчи: Роберто Манчини и Дејан Станковиќ.
Сегашниот селектор на Италија со Михајловиќ настапуваше и во Сампдорија и во Лацио, додека Станковиќ освен за репрезентацијата на Југославија, а потоа и на Србија и Црна Гора, на клупски план со Михајловиќ играше во Лацио и во Интер.
На погребот присуствуваше и целиот тим на Болоња, клуб кој Михајловиќ го водеше сѐ до почетокот на септември кога доби отказ поради слаби резултати.
Присуствуваа и легендарните хрватски играчи Звонимир Бобан и Роберт Просинечки, како и славниот италијански пејач Џани Моранди.