Бразилската sвезда Нејмар го постигна единствениот гол во финалето на Купот на Франција, во кој Пари Сен Жермен победи против Сент-Етјен со 1:0.
Напаѓачот постигна гол во 14. минута и им помогна на Парижаните да направат дабл на домашната сцена, но нивните амбиции не запираат тука, затоа што за една недела доаѓа финалето на Лига купот против Лион, а екипата на Томас Тухел е и во 1/4-финалето на ЛШ.
После 4 месеци пауза, ПСЖ не го покажа максимумот на своите можности, а Сент-Етјен сериозно го попречуваше гигантот од главниот град, иако играше со човек помалку скоро еден час заради црвениот картон на Лоик Перан.
Искусниот дефанзивец го повреди Килјан Мбапе и заслужено доби исклучување, а Мбапе останува во прашање за првиот меч со Аталанта на 12 август.
Ова беше 103. издание на натпреварувањето, а ПСЖ го крена трофејот за рекорден 13-ти пат. Сент-Етјен остана со 6 трофеи, од кои последниот датира од 1977 година.
Претходниот настап на „Зелените“ во финалето беше во 1982 година, кога повторно загубија од ПСЖ.
Радоста на ПСЖ сепак беше значително загасена од сознанието за повредата на Мбапе и сликата од младиот напаѓач на штаки фрли сенка на триумфот.
Денеска се очекува да се знае повеќе за сериозноста на повредата на Мбапе по грубиот старт врз него од страна на Лоик Перан.
Иако Мбапе изгледаше прилично вознемирен кога го напушти теренот, тој подоцна се врати на штаки и го догледа натпреварот.
За време на церемонијата на доделување на наградите, светскиот шампион размени неколку зборови со францускиот претседател Емануел Макрон, кој го праша за сериозноста на неговата повреда.
Еве како помина дијалогот меѓу двајцата:
Макрон: „Како е“?
Мбапе: „Почувствував мало пукање и боли малку“
Макрон: „Мислиш има скршеница?“
Мбапе: „Не, мислам дека нема“
Макрон: „Ќе одиш во болница?“
Мбапе: „Да, заминувам веднаш по доделувањето на наградите“
Првично, капитенот на Сент-Етјен, Перан доби само жолт картон за повредата, но откако судијата Амаури Делеру ја разгледа ситуацијата со ВАР, го избрка. За 34-годишниот Перан ова беше последниот натпревар во професионалната кариера, па уште понеразбирливо е зошто се одлучи за ваков груб старт врз младиот Мбапе.