Волтер Хикокс, жител на американската сојузна држава Флорида, успеал да се одбрани себеси и своите кучиња од мечката која влегла во неговата куќа.
Видеото на кое се гледа борбата на Хикокс со мечката стана популарно на социјалните мрежи, а официјални лица велат дека ова е втор напад на мечка за само една недела на Флорида.
„Сѐ што ми минуваше низ глава беше што ќе се случи ако помине покрај мене, бидејќи мојата сопруга и двете кучиња беа во куќата“, изјави Хикокс за WFTV.
Снимка од неговата борба со американската црна мечка е снимена од надзорна камера, а на неа се гледа како мечката влегува во тремот од куќата во Дејтонa Бич. Хикокс ја турка мечката и успева да ја исфрли од тремот, а потоа ја блокира вратата со клупа. Тој е само полесно повреден во тепачката со животното и вели дека ќе постави нова врата на тремот, како и дека ќе набави спреј за растерување мечки. Локалните власти соопштија дека мечката од видеото не е фатена.
Официјалните лица ги предупредија локалните жители да избегнуваат мечки по секоја цена, бидејќи ова е втор напад на животното врз луѓе за една недела. Претходно мечка нападна жена додека шетала куче во Дебари. Како што објаснуваат од Комитетот за заштита на природата на Флорида, мечка ненадејно скокнала пред жената, фрлајќи ја на земја. Жената била полесно повредена.
Подоцна во близина била пронајдена млада мечка со три младенчиња. Мечката била застрелана поради опасност за луѓето, според официјални лица од Флорида, додека мечињате биле ослободени.
Според официјалните податоци од Флорида, мечките живеат на 49% од територијата на оваа американска сојузна држава.
