Првата дама на САД Меланија Трамп дошла да работи во САД како манекенка и така го запознала претседателот Доналд Трамп. Тоа е добро познато. Но, откритието дека ја стекнала дозволата за постојан престој како „имигрант со извонредни способности“, позната како „Ајнштајнова виза“, ги разбесна граѓаните на САД.
„Вашингтон пост“ вчера ја објави целосната вест околу скандалот, откако неколку медиуми шпекулираа на темата што ја разбранува американската и светската јавност, со оглед на строгата и непопустлива анти-имигрантска политика на Трамп.
Визата EB-1 е предвидена за доселеници кои се успешни и уживаат „траен национален или интернационален престиж“ во своето поле, без разлика дали се работи за бизнисмени, наградувани уметници или спортисти наградени со медали.
Во службената биографија на Меланија Трамп објавена на веб-страницата на Белата куќа пишува дека првата дама „ги ставила во мирување студиите“.
Колку ретко се издава овој тип на виза и кои се спецификациите за нејзино добивање, покажува фактот дека во 2001 година, кога ја добила Меланија, само 0,34% од доселениците кои добиле зелена карта, односно дозвола за постојан престој, добиле „Ајнштајнова виза“.
Ова не е првата виза што ја добила Меланија – откако дошла во САД со туристичка виза, неколку пати добила HB-1 виза за високо квалификувани мигранти, а потоа го запознала Трамп и две години подоцна добила EB-1.
Тоа не е сѐ. Нејзините родители се доселиле во САД и добиле зелена карта токму благодарение на Меланија и нејзината „Ајнштајнова виза“ – на основа на „ланчана миграција“, истата онаа на која Трамп денес најстрого се противи.
Адвокатот на Меланија тврди дека првата дама е „повеќе од квалификувана“ за виза EB-1, но очекувано, многу корисници на социјалните мрежи не се согласија со него.