На последниот собир на македонската репрезентација за играчи до 19 година се појави и Шабан Зенку. И тука не би имало ништо необично сѐ додека не се погледне неговото минато репрезентативно CV.
Се работи за 18-годишен играч од средниот ред кој настапува во младинските категории на бундеслигашот Борусија од Менхенгладбах. Шабан Зенку е роден во Кичено на 8 февруари 2004 година, но неговиот репрезентативен пат почнал во Косово.
Прво добил повик и настапил за У18 репрезентацијата на Косово. Тоа било годинава. Но, потоа стигнал повик од Албанија У18, па се преселил во таа репрезентација.
ФФМ дознала дека Зејнку е всушност кичевчанец, па го контактирала во обид да го премисли и да ги брани боите на својата родна земја. Зенку прифатил, па во само една календарска година успеал да облече дрес на дури три различни репрезентации.
За Македонија У19 веќе настапи на пријателските против Кипар одиграни во саботата и понеделникот во Скопје. Настапи на двата натпревара, а на вториот постигна и гол од слободен удар (Македонија победи со 3:2).
„Добив покана од сите три репрезентации и стекнав искуство од сите. Многу ми се допадна, особено во Македонија и среќен сум што со мојот гол ѝ помогнав да победи“, изјави Зенјку говорејќи за косовскиот портал GazetaBlic Sport.
„Поминав убаво, но кратко време во Косово. Добив покана и ја прифатив и видов се. Сепак, јас сум од Кичево, па поинаку е да се игра за Македонија“, додаде.
