Германската војска со традиционална парада се збогува од германската канцеларка Ангела Меркел која за една недела, по 16 години власт, ќе замине во политичка историја.
Свеченоста, чии корени датираат од 16 век, е најголемата почест што германските оружени сили ги даваат на некој цивил.
Меркел им се заблагодари на соработниците и на семејството, а на наследникот Олаф Шолц му посака среќа.
„Шеснаесет години на местото на канцеларка беа исполнети со бројни настани и предизвици. Тие години за мене беа предизвик и во политичка и во човечка смисла. Но, тоа беше и време кое ме исполни“, изјави Меркел во краткиот говор.
Таа проговори и за антинаучните ставови во општеството, како и за сите присутни теории на заговор.
„Нашата демократија зависи и од нашата способност за критички дискурс и самоисправување. Зависи од разговор за интереси и меѓусебно почитување. Зависи од солидарност и доверба, особено на доверба во фактите. И насекаде каде научните факти се негираат, а се шират кампањи на омраза и теории на заговор, отпорот мора да биде силен и гласен“, порача Меркел.
Како најголеми предизвици ги наведе финансиската криза во 2008 година и бегалската во 2015 година.
„Тогаш сфатив колку се важни меѓународните институции и мултилатералните инструменти бидејќи кризите не познаваат граници“, рече Меркел.