По неколку месеци расправија, Sony се согласи на 10-годишен договор.
Sony ја прифати понудата од Microsoft, во која производителот на Xbox конзоли се обврза да објави нови Call of Duty игри за PlayStation во следните 10 години. Овој договор го означува крајот на повеќемесечниот спор што започна кога Microsoft одлучи да го купи Activision Blizzard во рекордна аквизиција.
„Задоволство ни е да објавиме дека Microsoft и PlayStation потпишаа обврзувачки договор за задржување на Call of Duty на конзолите на PlayStation по купувањето на Activision Blizzard. Се радуваме на иднината каде играчите на глобално ниво ќе имаат повеќе избор да ги играат своите омилени игри“, вели Фил Спенсер, првиот човек на Xbox.
Иако првичната понуда на Microsoft до Sony беше да ги задржи сите постоечки наслови на конзолите Activision на конкурентската платформа, вклучувајќи ја и франшизата Call of Duty до крајот на 2027 година, договорот се промени. Сега, договорот меѓу двете компании вклучува само Call of Duty, но со продолжување на 10 години.
Поради пречките кои му ги даваат регулаторите ширум светот, Microsoft беше на позиција од самиот почеток дека Call of Duty ќе остане на другите конзоли, наведувајќи дека, финансиски гледано, нема смисла да се отстрани франшизата од конзолите на Sony.
Откако ја победи Федералната трговска комисија (FTC) на суд, единствената пречка со која сега се соочува Microsoft се регулаторите во ОК. Сепак, најголемиот проблем што гигантот од Редмонд го има со британските регулатори не е Call of Duty, туку cloud gaming, па овој договор постигнат со компанијата Sony нема многу да им помогне.
