Evergreen, компанијата чиј брод Ever Given заглави во Суецкиот Канал и предизвика блокирање на сообраќајот, ќе мора да плати огромна штета.
Се проценува дека блокадата на Суецкиот Канал спречи минување на товар вреден 9,8 милијарди долари секој ден.
Речиси седум дена по заглавувањето и после неколку неуспешни обиди, Ever Given беше поместен и можеше да заплови, но товарниот брод сè уште не го напуштил каналот. Египетските власти го чуваат бродот во каналот сè додека сопствениците не се согласат да платат милијарда долари отштета.
„Бродот ќе остане тука сè додека истрагата не заврши и не се исплати отштета. Се надеваме на брз договор“, изјави генералот Осама Раби.
Отштетата треба да ги покрие трошоците за користење на опремата со која е отстранет бродот, да се плати работната сила, како и штетата предизвикана во каналот. Египетските власти исто така започнаа истрага за причината за инцидентот.
