Неодамна на Малдивите се одржа првиот натпревар за Мис Универзум Пакистан, а девојката која победи на изборот се соочи со низа критики.
Имено, 24-годишната Ерика Робин со денови е изложена на критики во јавноста, поттикнати од одредени верски лидери и власта.
Така, сенаторот Муштак Ахмед од партијата Џемаат-е-Ислами ја нарече срам, а привремениот премиер Анвар ул-Хак Какар бара истрага. Причината за омразата доаѓа од тоа што Робин сака да го претставува Пакистан, кој не сака да биде дел од такво натпреварување.
Инаку, Ерика Робин е христијанка која живее во Карачи. Во Пакистан има 2,63 милиони христијани, но се само 1,27% од населението. Од петте финалистки е избрана за Мис Универзум Пакистан, по што ќе го претставува Пакистан на престижниот избор за убавина Мис Универзум.
„Одлично е чувството да се претставува Пакистан, но не разбирам од каде доаѓа реакцијата. Мислам дека тоа е поради идејата дека ќе парадирам во костим за капење во соба полна со мажи“, изјави Робин за BBC.
Ерика Робин потсети дека за време на вториот круг од изборите, кој се одржа на интернет, нагласила што сака да направи за својата земја.
„Одговорив дека би сакала да го сменам начинот на размислување дека Пакистан е заостаната земја“, изјави Робин.
Натпреварот, кој се одржа на Малдивските Острови, го организираше Yugen Group со седиште во Дубаи, која е организатор на Мис Универзум Бахреин и Мис Универзум Египет, а организацијата соопшти дека на изборот за Мис Пакистан имало неверојатен број пријавени.
Финалето на Мис Универзум ќе се одржи во Ел Салвадор во ноември оваа година.