Астронаутите што ќе бидат дел од мисијата Artemis 2 на НАСА ќе тестираат ласерска комуникација на патот околу Месечината со цел побрз пренос на фотографии и видеа.
Американската вселенска агенција НАСА користи ласери за да ја подобри комуникацијата меѓу вселенските летала. Во минатото се потпираше на радио-сигнали испратени преку нејзината мрежа за длабока вселена за на Земјата да ги пренесе сите видови научни податоци од длабоките вселенски сонди. Сепак, ласерите имаат потенцијал значително да го зголемат количеството на податоци што може да ги испрати вселенско летало, а НАСА сега е подготвена да ја тестира оваа технологија за време на патувањето околу Месечината.
Станува збор за ласерска комуникација во форма на терминал Orion Artemis 2 Optical Communications System (O2O), што ќе се користи за време на мисијата Artemis 2. Во оваа мисија ќе учествува и екипаж, кој ќе тргне на патување околу Месечината.
„Системот O2O во капсулата Orion ќе испраќа на Земјата фотографии и снимки со висока резолуција од лунарниот регион“, соопшти НАСА. Ако сѐ оди според планот, системот треба да им овозможи на гледачите на Земјата да ја видат Месечината во реално време како никогаш досега.
За да ја постави основата за идните ласерски комуникации, НАСА лансираше неколку демонстративни сателити во текот на изминатите неколку години. Laser Communication Relay Demonstration (LCRD) беше лансиран во декември 2021 година како прво ласерско рилеј на американската агенција. Следеше лансирањето на TeraByte InfraRed Delivery (TBIRD) CubeSat минатата година, кој достигна брзина на пренос на податоци од 200 GB во секунда.
Сега НАСА се подготвува да го лансира терминалот LCRD Low-Earth-Orbit (LEO) User Modem and Amplifier Terminal (ILLUMA-T)m за да се приклучи на јапонскиот експериментален модул на Меѓународната вселенска станица. Откако ќе биде оперативен, ILLUMA-T ќе пренесува податоци на Земјата преку LCRD и ќе ја постави основата за системот O2O што ќе биде на капсулата Orion за време на мисијата Artemis 2.
НАСА планира на Земјата да пренесува фотографии и видеа во реално време или речиси во реално време за време на мисијата Artemis 2, па се очекуваат спектакуларни глетки.