Model 3 на Tesla влезе во автомобилската историја со 450.000 нарачки уште пред да биде премиерно претставен. Но, почетниот ентузијазам и одушевување се чини спласнуваат.
Листата за нарачки за Model 3 беше отворена на 31 март, 2016 година. Луѓе чекаа редици небаре се делат автомобили бесплатно, знаејќи дека ќе чекаат со месеци да им биде испорачан електричниот автомобил. Имаше 400.000 нарачки до крајот на април истата година и сите уплатија депозит од 1.000 долари.
До првите испораки неколку месеци по резервацијата се откажаа околу 12% од нарачателите, односно 63.000. Сепак, со новите заинтересирани, бројката на луѓе кои ја чекаат својата електрична Tesla се искачи на неверојатни 455.000.
Годинава нештата малку се сменија. Second Measure објави дека моментално повеќе луѓе се откажуваат отколку што се пријавуваат. Редиците исчезнаа, а делот на откажани порасна на 23%. Од компанијата велат дека овие бројки не е се точни, но одбија да кажат кои се точните бројки.
Се претпоставува дека поводот за толку многу откажувања е одложувањето на лансирањето на основната изведба што би чинела околу 35.000 долари. Неизвесна стана и субвенцијата од 7.500 долари, а бројот на достапни ривали постојано расте.
Производството на Model 3 моментално се одвива со 260.000 примероци годишно.
Колку чини производството на електричниот Model 3? На ова прашање одговори германски WirtschaftsWoche. Според нивната пресметка, производството на автомобилот не чини повеќе од 28.000 долари, од кои 18.000 долари се за материјал, а останатите 10.000 долари се трошоци за изработка.
Планот на компанијата на Елон Маск е јасен: до крајот на месецот треба да стигне до производство од 5.000 примероци месечно, од сегашните 3.500.
