Манчестер Јунајтед размислува за доведување на Лука Модриќ, тврди шпанскиот новинар Едуардо Инда.
Јунајтед оваа сезона игра очајно, во Премиер лигата е на 10. место со 12 бода од осум натпревари, а во Лигата на шампионите загуби од Баерн и Галатасарај.
„Модриќ сè уште не знае каде ќе ја заврши сезоната. Има клубови кои се распрашуваат за него, а еден од нив е Манчестер Јунајтед. Единствениот проблем е што Јунајтед е последен во својата група во Лигата на шампионите и најверојатно нема да биде во тоа натпреварување по Божиќ“, рече Инда, уредник на Okdiario.
„Модриќ сака да игра и се жали дека нема натпреварувачки ритам. Јунајтед знае дека Модриќ не е среќен во Реал и прашува како да го доведе во јануари“, додаде Инда.
Капитенот на хрватската репрезентација пред оваа сезона го продолжи договорот со Реал за уште една година, но е разочаран од статусот кај Карло Анчелоти откако повеќето од натпреварите ги започна на клупата за резерви.
„Модриќ ќе почека два месеци за да види дали ќе му се смени статусот. Дури потоа ќе одлучи што ќе прави со кариерата“, изјави Инда за 38-годишниот играч за врска кој е во мадридскиот клуб од 2012 година.
