Белгискиот Федерален центар за јавно здравје предупредува дека постојат сценарија за нов, поголем бран на зараза со COVID-19 уште во август, но оти е можен и трет бран.
– Можно е бројот на заразени како и бројот на хоспитализирани луѓе наскоро повторно да почне да расте доколку пребрзо и немарно се укинат рестриктивните мерки или доколку не се придржуваме до правилата, изјави белгискиот епидемиолог Стевен ван Гухт.
Белгиските експерти предупредуваат дека не е исклучено и воведување на втор „карантин“ на земјите на зима со цел да се намали ширењето на инфекцијата.
– Сѐ зависи од тоа колку ќе успееме да го адаптираме нашето однесување на новонастанатата ситуација и колку ќе биде успешна стратегијата за следење на контактите, се наведува во соопштението на белгискиот Центар за јавно здравје.
Од новиот коронавирус досега во светот се излекувале 1.242.432 лица, а се намалува и бројот на заболени кои се критична состојба, кој сега изнесува 2%.
Според Worldometer, во светот досега од коронавирусот се заразија 3.727.936 лица, а починаа 258.344 луѓе.
Најтешка е состојбата во Соединетите Американски Држави, каде се заразени повеќе од 1,2 милиони луѓе, а повеќе од 72.000 починале, додека од европските земји Шпанија е со најголем број заразени, а по бројот на починати вчера Велика Британија ја надмина Италија.
Во Европа, по Шпанија, најмногу заразени има во Италија, Велика Британија, Германија и Русија, а најмногу смртни случаи по Британија има во Италија, Шпанија и Франција.
Од латиноамериканските земји најлоша е состојбата во Бразил, а на Блискиот исток во Иран.
Во Кина, од каде што се прошири вирусот, досега се заразени 82.883 лица, а починаа 4.633.
Во регионот по бројот на заразени и починати и натаму предничи Романија со 13.837 заразени и 841 починат.
