Скопје, 10 јуни 2020 (МИА) – Министерството за внатрешни работи соопшти дека во изминатото деноноќие регистрирани се 1.143 прекршоци за граѓани кои не ја почитувале мерката за носење маски.
На територијата на Република Северна Македонија на 905 лица им се издадени решенија за изолација, а 120 лица потпишале изјави за самоизолација.
Од страна на полициски службеници извршени се контроли кај лица во изолација и самоизолација и не се евидентирани лица кои не ја почитувале мерката за изолација и самоизолација.
Основното јавно обвинителство Прилеп до Основниот суд Прилеп поднесе предлози за издавање казнени налози против 11 лица, а до Основниот суд Крушево поднесе предлози за издавање казнени налози против пет лица, сите за сторено кривично дело – Непостапување според здравствените прописи за време на епидемија.
Како што соопшти Јавното обвинителство, обвинетите во Прилеп или Крушево го прекршиле полицискиот час, па обвинителството за секого од нив во надлежните судови, предложи парична казна од 100 дневни глоби со вредност на една дневна глоба од 20 евра во денарска противвредност.
Основното јавно обвинителство во Велес до Основен суд Велес поднесе предлози за издавање казнени налози за пет лица кои го сториле кривичното дело – Непостапување според здравствените прописи за време на епидемија.
-Обвинителството на Судот му предложи на обвинетите за стореното кривично дело да им изрече парични казни во висина од 40 дневни глоби во износ од по 20 евра, односно вкупно по 800 евра во денарска противвредност, се наведува во соопштението од Јавното обвинителство.
Обвинетите, како што посочуваат од Обвинителството, биле затекнати од страна на полициските службеници како се движат пеш или со автомобил по улиците низ градот додека во сила била Одлуката за забрана и посебен режим за движење на територијата на Република Северна Македонија.