Во 1972 година славната рок група „Ролинг Стоунс“ го објави едниот од своите најдобри албуми - „Exile on Main Street“, а од погонот на Ferrari излезе примерок од моделот Dino, кој истата година пристигна во гаражата на легендарниот рок гитарист Кит Ричардс.
Стигнувањето на самиот врв на светските топ листи, многу рок ѕвезди го прославуваа со купување на скапоцени суперспортски автомобили, а некои од нив, како Ник Мејсон од „Пинк Флојд“, станаа и големи автомобилски колекционери.
Гитаристот Кит Ричардс во 1972 го купи автомобилот Ferrari Dino 246 GT. За разлика од некои други сопственици, кои ваквите автомобили ги возеа повремено, Ричардс воопшто не го штедеше.
Наместо да го остави да собира прашина во гаража, славниот гитарист интензивно го користеше во текот на седумдесеттите години, кога неговиот бенд имаше турнеи ширум Европа.
„На тие турнеи по Европа групата патуваше со авион, додека Кит, кој го избегнуваше летањето секогаш кога имаше прилика за тоа, патуваше со своето Ferrari. Поради долгите патувања, тој често пристигнуваше во хотелите среде ноќ“, се сеќава Ален Дан, кој беше менаџерот на турнеите на „Ролинг Стоунс“.
Ferrari Dino 246 GT повеќе од 15 години остана во сопственост на британскиот гитарист, пред да го купи еден јапонски колекционер.
Кај него автомобилот се задржа до 2014 година, за истата година да биде продаден на аукција во Монако на уште еден музичар - Лијам Хаулет од групата „Продиџи“.
Хаулет неколку години го поседуваше овој автомобил, за потоа да му го продаде на моменталниот газда, кој одлучи да го понуди на аукција и да заработи на овој автомобил.
Моделот Dino е офарбан во сребрена боја и зад себе има околу 50.000 поминати километри, од кои околу 40.000 помина додека во седумдесеттите и осумдесеттите години го возеше Кит Ричардс.
Моторот на автомобилот е реставриран пред неколку години, а аукциската куќа Бонхамс очекува дека автомобилот, на аукцијата која се одржува следната недела, ќе достигне цена помеѓу 300.000 и 400.000 фунти.
