Владата на Шпанија денеска донесе одлука за затворање на сите хотели и хостели во земјата, во обид да го запре ширењето на коронавирусот, од кој досега во таа земја починаа 1.002 граѓани, а 19.980 се заразени.
Сите хотели мора да ги заклучат вратите откако ќе заминат и последните клиенти кои се таму, најдоцна во рок од една недела.
„Собирањето луѓе во туристички сместувачки места, каде користат заеднички простории, го зголемува ризикот од зараза, па затоа е неопходно да се спречат луѓето да се движат таму. За да се спречи ширењето на вирусот, ние за јавноста ги затвораме ваквите објекти”, соопшти шпанското Министерство за здравство.
Затворањето на хотелите ќе биде нов удар за економијата, зависна од туризмот. Плажите се затворени од неделата, при што полицијата ги предупредува туристите да се вратат во хотелите преку разглас на англиски јазик.
Се очекува во главниот град на Шпанија осум од десет луѓе да бидат позитивни на новиот коронавирус“, изјави Изабел Диза Ајусо, претседателка на регионот на Мадрид.
Таа вели дека повеќето ќе имаат благи симптоми, но дека болеста ќе биде проблем за ранливата категорија луѓе кои се 15% од населението, пренесе CNN.
„Овој вирус веќе подолго време се наоѓа во Шпанија и практично скоро сите ќе го имаат. Кај повеќето нема да остави видливи траги, но проблем е ранливата популација“, изјави градоначалничката.
Таа болеста ја нарече смртоносна за постарите луѓе кои имаат здравствени проблеми и вели дека тие во период од 24 до 48 часа од заболувањето можат да починат.
Колку е лоша ситуацијата во Европа? Бројката на луѓе починати од вирусот во Италија за еден ден се искачи на 475, а скоро 3.000 се починати во Италија. Во земјата има 35.713 потврдени случаи и повеќе од 4.000 закрепнати. Италија е најлошо погодена земја по Кина.
Во Франција бројката е 7.730 заразени и 175 смртни случаи. Во Обединетото Кралство има 104 смртни случаи. Во Германија има 12 смртни случаи и 8.198 заразени. Во Белгија 14 смртни случаи и 1.486 заразени, пренесе BBC.