Цените на нафтата на светските берзи се зголемија минатата недела, враќајќи ги загубите од претходната недела, бидејќи трговците очекуваат Организацијата на земјите извознички на нафта (ОПЕК) и нејзините сојузници да ги задржат ограничувањата на производството во следниот квартал.
На лондонскиот пазар цената на барелот минатата недела порасна за 2,4 отсто, на 83,55 долари, додека на американскиот пазар цената на барелот порасна за 4,5 отсто, на 79,97 долари.
Во текот на неделата цените се движеа во тесен опсег, а позначително пораснаа, околу 2 отсто, само во петокот.
Тие се поддржани од геополитичките тензии на Блискиот Исток, како и од проценките дека ОПЕК и неговите сојузници од картелот ќе одржат ограничено производство и во вториот квартал. Одлуката треба да биде донесена оваа недела.
Поддршка за цените дава проценката на трговците дека Саудиска Арабија нема значително да ги промени цените на нафтата што им ја продава на азиските клиенти во април.
Од друга страна, значителното зголемување на цените спречува забавување на растот на најголемите светски економии, а со тоа и на побарувачката на нафта.
Со оглед на тоа што инфлацијата во САД продолжува да се движи далеку над целните нивоа на американската централна банка од 2 отсто, претставници на ФЕД велат дека нема брзање за намалување на каматните стапки.
А тоа значи дека може да очекуваме дополнително забавување на растот на најголемата светска економија, како и на потрошувачката, па не би требало да се зголемува ниту побарувачката на нафта.
Дотолку повеќе што Европската централна банка веројатно нема да брза со намалување на каматните стапки, па не се очекува раст на побарувачката ниту во Европа.
Покрај тоа, кинеската економија, најголемиот увозник на нафта во светот, не закрепнува толку брзо како што се надеваа трговците.
Главно поради геополитичките тензии на Блискиот Исток, од почетокот на годината цената на нафтата на лондонскиот пазар е зголемена за повеќе од 8 отсто, а на американскиот пазар за повеќе од 10 отсто, откако минатата година падна за околу 10 отсто.
