Конфликтот во Нагорно-Карабах зема сè повеќе жртви секој следен ден. Војната меѓу Ерменија и Азербејџан влезе во 17-тиот ден.
Официјални службеници на самопрогласената република Арцах објавија дека биле убиени уште 17 ерменски војници.
Ерменските медиуми објавија фотографии од разурнатиот град и уништени куќи.
Портпаролката на ерменското Министерство за одбрана Шушан Степанјан ги негираше изјавите на Баку дека ерменските сили гранатирале азербејџански територии.
„Целосно ги негираме обвинувањата на Министерството за одбрана на Азербејџан против Ерменија за гранатирање во правец кон регионот Тертер. Со овие лажни информации, азербејџанската страна подготвува терен за агресивни акции против мирни населби“, напиша Степанјан на Facebook.
Според неа, изјавата за гранатирање на азербејџанскиот регион Агџабеди е исто така неточна, пренесува руски Спутник.
„Ерменската страна го почитува режимот на хуманитарен прекин на огнот, а Азербејџан со офанзивни активности го крши овој режим“, истакна портпаролката.
Азербејџанското Министерство за одбрана објави дека Ерменија е таа која го крши хуманитарното примирје во четири области во близина на Нагорно-Карабах.
„Ерменските вооружени сили, грубо кршејќи го режимот на хуманитарно примирје, ги гранатираат териториите на регионите Горанбој, Тертер и Агдам“, се вели во прес-службата на Министерството за одбрана на Азербејџан.
Од Министерството во Баку подоцна соопштија дека ерменските сили го гранатираат регионот Агџабеди, но исто така и дека азербејџанските сили уништиле три ракетни лансери BM-21 Grad, еден противвоздушен ракетен систем TOR-М2КМ, 3 беспилотни летала и неколку парчиња друго оружје на ерменските сили.
Вкупно 542 ерменски војници загинаа од избувнување на вооружени конфликти на 27 септември, соопштија денеска официјални лица на самопрогласената република Арцах.
Во наизменичните судири што избувнуваат во Нагорно-Карабах од 1990 година наваму, загинале околу 30.000 луѓе, се вели во извештајот на руската агенција Интефакс, пренесува Reuters.
09:32 часот
Министерството за одбрана на Азербејџан објави дека нивните сили го почитуваат примирјето и не вршат офанзивни напади или пукања.
