Носењето заштитна маска во јавност помага во спречувањето на ширење на коронавирусот, но некои луѓе сепак имаат проблеми со нејзината употреба. Ја носат, но со неа ја прекриваат само устата, но не и носот.
Угледен германски виролог истакнува дека таквото користење нема никаква смисла.
„Ако носот остане откриен, честичките имаат директен пат до организмот и тоа е исто како да воопшто не носите маска“, вели д-р Јонас Шмит-Чанасит.
Додава дека целта на заштитната маска е да ги задржи честичките кои нејзиниот носител ги испраќа кога зборува, кашла или кива. Со тоа, другиот е заштитен од зараза. До одредена мера маската го штити и носачот од вдишување на туѓите честички.
Но, ако носот остане откриен, честичките имаат директен пат. Правилно е маската да не ја допирате со раце и да ја користите единствено со помош на лентичките за ставање или вадење.
Добро е да ја носите маската кога сте во близина на други луѓе подолго време, на пример во автобус. Можноста за зараза не е толку веројатна ако сте покрај некого во текот на пократко време.
„Десет до 15 минути, тоа е критичната точка“, вели докторот.
На многу места носењето заштитна маска е задолжително. Но, германскиот виролог вели дека и со маска треба да држиме физичка дистанца, бидејќи маските не ги носиме доволно цврсто за да нè заштитат од аеросолите, уште помали честички во воздухот кои лесно можат да дојдат до устата и од страничните отвори.
