Претставник на Противпожарната служба на Њујорк за CNN изјави дека 13 лица се пренесени во болница после пукањето на метро-станицата во Бруклин, Њујорк.
Агенцијата DPA, повикувајќи се на полициски извори, пренесе дека вооружен маж со гас-маска и портокалов елек каков што користат градежни работници фрлил димна бомба во возот во њујоршкиот кварт Бруклин, а потоа отворил оган врз патниците, ранувајќи 5 лица. Според извори од њујоршката полиција, веднаш откако се затвориле вратите на возот, човекот со елекот фрлил неколку димни бомби во вагон и почнал да пука. Кога возот стигнал до станицата на 36-та улица, вратите се отвориле по што ранетите патници излегле од возот, некои со помош на други луѓе, и паднале на перонот.
Според полицијата, една од жртвите е во несвест и во критична состојба.
Вооружениот напаѓач бил опишан дека носел гас-маска и портокалов градежен елек, веројатно на компанијата MTA. Тој носел и градежен алат, јави DPA.
Според CNN, сите училишта во околина се под „засолниште“, што значи дека никој не смее да ја напушти зградата, а само ученици смеат да влезат, објасни портпаролот на Министерството за образование. Тој не кажа за колку училишта станува збор.
Портпаролката на Белата куќа, Џен Псаки на Twitter напиша дека американскиот претседател Џо Бајден е информиран за инцидентот.