На фудбалерот Макс Тејлор пред девет месеци му беше дијагностициран рак. Ја победи болеста, се врати во тимот на Манчестер Јунајтед, а сега тренерот Солскјер го вклучи во првиот тим за гостувањето во Казахстан.
На овој 19-годишен централен бек во февруари годинава му беше дијагностициран рак на тестисите. Откако со месеци се лекуваше и успешно ја заврши терапијата, во септември се врати на тренинг и за брзо заигра за У23 тимот на Манчестер Јунајтед.
Бидејќи „Црвените ѓаволи“ веќе изборија пласман во нокаут фазата од Лига Европа, тренерот Оле Гунар Солскјер одлучи со подмладен состав да отпатува на гостувањето кај Астана во далечниот Казахстан. Го повика и Тејлор каде младиот борец ќе чека шанса да дебитира за првиот тим на Јунајтед.
Секако дека и повикот е големо признание за младиот играч со оглед на тоа што на почетокот од годинава имаше тежок животен предизвик пред себе, а со победата над ракот покажа дека има победнички менталитет и докажа дека во животот ништо не е невозможно.
