Брод на духови, кој со години талкал по Пацификот, се појавил кај Маршалските Острови полн со кокаин.
Напуштениот брод, според неговата состојба, веројатно минал години талкајќи по брановите на Тихиот Океан пред да пристигне во водите на оваа островска република. Првичните проценки велат дека бродот веројатно потекнува од другата страна на Пацификот, од некоја од државите во Јужна или Централна Америка.
Ричард Хиксон, кој е јавен обвинител во Маршалските Острови, вели дека на бродот долг 5,5 метри пронашле дури 649 килограми кокаин скриени под палубата.
Дрогата била во пакети од по 1 килограм секој означен со буквите KW. Локалната полиција веќе ја запалила претаката освен два пакета кои ќе бидат предадени на Американската агенција за дрога каде ќе бидат анализирани.
Интересно, ова не е прв пат ваков товар од Америка да се појави на Маршалските Острови. Често пати жителите на оваа мала република во Океанија налетуваат на пакети со дрога во нивните води. Но, последниов товар е дефинитивно најголем.
А, пак, во 2014 година рибарот Хосе Алваренга од Ел Салвадор се појавил на Маршалските Острови откако 13 месеци претходно заедно со пријател биле по риба во Мексико и струјата ги одвлекла. Неговиот другар починал во текот на патешествието.
Компјутерска симулација открива дека струјата навистина мое да пренесе брод од Централна и Јужна Америка преку целиот Тихи Океан сѐ до островите на Микронезија и Полинезија.