Американската вселенска агенција НАСА претстави 3D печатен простор на куќа од 160 м² во Тексас, каде група луѓе ќе се подготвуваат за „вистинските предизвици“ на идните мисии на Марс.
НАСА го претстави живеалиштето во хангар во вселенскиот центар „Џонсон“ во Хјустон, Тексас, каде четворица волонтери ќе почнат да се подготвуваат за „мисијата на Марс“ ова лето преку копнена симулација, помагајќи ѝ на НАСА да се подготви за човечко истражување на Црвената планета.
„Ова е од клучно значење за тестирањето решенија кои ги задоволуваат сложените потреби на животот на површината на Марс“, рече Грејс Даглас, водечка научничка на НАСА во истражувачкиот труд Advanced Food Technology.
Првата „мисија“ треба да започне во јуни кога екипаж од волонтери, кои не се астронаути, ќе влезат во 3D печатениот простор.
„Симулациите на Земјата ќе ни помогнат да ги разбереме и одговориме на физичките и менталните предизвици со кои ќе се соочат астронаутите пред да заминат“, додаде Даглас.
За време на симулацијата, четворица членови на екипажот ќе живеат и работат во 3D печатен ICON модул кој вклучува две бањи, вертикална фарма за зелена салата, соба за медицинска нега, простор за релаксација и неколку работни станици.
Таму, тие ќе спроведат различни активности од мисијата, вклучувајќи симулирани вселенски прошетки или Marswalks, роботски операции, одржување на живеалиштата, лична хигиена, вежби и раст на културите.
