Интересна информација доаѓа од САД каде се подготвуваат два нови пазари и се зголемува бројот на клубови.
Со години се зборува за потенцијално проширување на НБА од 30 на 32 клуба, а како што пишува Front Office Sports, американскиот портал кој се занимава со спортски бизнис, се чини дека сѐ ќе се разјасни кога ќе биде склучен новиот договор за ТВ правата. Актуелниот истекува на крајот на следната сезона и НБА лигата веќе работи на нов договор кој ќе биде уште побогат, а се чини дека ќе вклучува уште две франшизи кои само ќе ги зголемат навивачките бази.
Градовите кои се фаворити за добивање на НБА клубови се пред сѐ Лас Вегас и Сиетл, кој исто така се споменува со години. Што се однесува до новиот клуб од „градот на гревовите“, инвеститор наводно би можел да биде Леброн Џејмс, кој конкуренција ќе има во Шекил О'Нил. Двајцата изразија интерес за вложување во клуб од Лас Вегас. Сиетл ја имаше франшизата Сиетл СуперСоникс од 1967 до 2008 година, но потоа правата беа префрлени на Оклахома Сити. Жителите на Сиетл сѐ уште не го имаат преболено згаснувањето на популарните Соникс. Лас Вегас никогаш немал клуб во НБА.
Со оглед на тоа дека двата клуба се од западниот брег, тоа би значело дека некој ќе мора да се пресели во Источната конференција. Според некои информации тоа би можело да бидат Минесота Тимбервулвс, Мемфис Гризлис или Њу Орлеанс пеликанс, а засега нема дефинитивна потврда како НБА лигата ќе го реализира овој трансфер.
Покрај овие промени кои нѐ очекуваат во иднина, НБА одлучи веднаш да го промени форматот на Ол-стар натпреварот. Средбата ќе се одигра на 18 февруари во Индијанаполис, а по пауза од неколку години - ќе гледаме пресметка меѓу играчите на Источната и Западната конференција. Она што ќе остане исто е процесот на гласање за одредување на Ол-стар тимовите (со по 12 од секоја конференција), додека се укинува „неограничениот четврти дел“ во кој целта е да се надмине одреден број бодови.