Поранешниот потпретседател на Зимбабве, Емерсон Мнангагва, денес ќе поднесе заклетва како шеф на државата, откако досегашниот лидер Роберт Мугабе си поднесе оставка.
Шефот на пратеничката група ЗАНУ-ПФ, Лавмор Мутаке изјави за Ројтерс дека Мнангагва ќе поднесе заклетва до 48 часа од оставката на Мугабе и ќе застане на местото претседател на Зимбабве до истекувањето на мандатот на Мугабе, до следните избори, кои мораат да бидат одржани до септември 2018 година.
93 – Годишниот Мугабе во вторникот си поднесе оставка.
Тој истакна дека оставката ја поднесува „веднаш и доброволно“ после цели 37 години владеење.
Оставката беше поднесена во пишана форма и била прочитана пред пратениците во парламентот, кои таа информација ја дочекале со големо воодушевување.
Неговата оставка следуваше после една недела од кога војската ја презема власта, откако Мугабе го разлути народот со отпуштање на својот долгогодишен заменик.
