Западните сојузници денеска најавија дека ќе испорачаат нови системи за противвоздушна одбрана на Украина и потврдија дека ќе продолжат силно да им помагаат на украинските сили во борбата против Русија.
Ова беше соопштено на состанокот на Контакт групата за одбрана на Украина, која беше формирана на иницијатива на САД по рускиот напад врз Украина и која се собра на маргините на состанокот на министрите за одбрана на земјите членки на НАТО денеска и утре во Брисел.
Во Контакт групата има повеќе од 50 земји, вклучително и 30 членки на НАТО. На состанокот учествуваше украинскиот министер за одбрана Олексеј Резников.
Резников: Ова е нова ера
Генералниот секретар на НАТО, Јенс Столтенберг, рече дека испораката на овие системи, кои можат да ги неутрализираат руските ракети на украинското небо, е „приоритет“.
Украинскиот министер за одбрана Резников ја поздрави „новата ера на противвоздушна одбрана“ со најавеното пристигнување на „системот Iris-T од Германија“ и претстојната испорака на „американскиот NASAMS“. Американскиот министер за одбрана Лојд Остин на почетокот на состанокот ги осуди руските напади врз украинските градови, врз цели кои немаат воена цел.
„Целиот свет штотуку ја виде злобата и суровоста на војната на Путин, вкоренети во агресија и поттикнати од длабок презир кон правилата на војната“, рече Остин.
„Но, најновите руски напади само ја продлабочија одлучноста на украинскиот народ и дополнително ги обединија земјите со добра волја од сите делови на светот“, додаде тој.
