Јапонски и италијански научници предложија метода за заспивање расплакано бебе за само 13 минути.
Тврдат дека родителите ќе го смират детето така што ќе го држат во прегратка и притоа ќе се движат, а откако ќе заспијат не треба пребрзо да го стават го креветче.
Детето треба да го доближите покрај телото и да го носите пет минути со изедначено темпо, без ненадејни движења, напишаа научниците во студија објавена во Current Biology.
Кога детето ќе заспие, родителот и понатаму треба да го чува во прегратка уште 5 до 8 минути пред да го стави во креветчето.
„Многу родители страдаат затоа што доенчето им плаче навечер“, вели Куми Кудроса, авторка на студијата и професорка на Институтот Рикен во Јапонија. „Тоа е голем проблем, особено за неискусните родители и може дополнително да го подигне нивото на родителски стрес и во ретки случаи дури и да одведе до злоставување на детето“, вели таа.
Курода и нејзините колеги следеле како децата реагираат во четири ситуации: додека мајката ги држи во прегратка истовремено движејќи се, додека ги држи во прегратка во седечка положба, додека лежи во детско креветче и во ситуација кога нежно го ниша детето.
Нивното однесување било снимено со камера, а со ЕКГ уреди биле мерени срцевите отчукувања.
Расплаканите деца се смириле по 30 секунди носење, а отчукувањата на срцето им се забавиле. Сите деца престанале да плачат, а половина од нив заспале. Но, кога мајките веднаш ги ставиле во креветче, скоро третина од бебињата се разбудиле за 20 секунди.
Иако во студијата учествувале само мајки, Курода смета дека реакцијата на бебињата би била иста и со татковците или некое трето лице кое ги чува. Научниците сметаат дека децата се смириле благодарение на така наречениот одговор на пренесување, својствен на цицачите кои се раѓаат беспомошни. Таквите цицачи, а меѓу нив и луѓето, бараат родителска грижа и хранење долго време.
Во студијата учествувале само 21 дете, па научниците тврдат дека нивните резултати треба да се потврдат со поопсежна студија.