Научниците потврдија дека Земјата ја следи „тројански астероид“ - дури вториот таков објект досега откриен - а според истражувачите овој примерок ветува многу повеќе од претходниот.
Тројанските астероиди ја делат орбитата на планетата во точки каде гравитацијата на Сонцето и планетите се поништуваат една со друга. Додека некои планети имаат цели племиња на тројански астероиди, нивното наоѓање околу Земјата е многу тешко.
Претходно откриените „тројанци“ ги добија имињата по оние кои први биле пронајдени околу Јупитер, а беа именувани по личности од Тројанската војна.
Сепак, досега само еден е забележан околу Земјата, познат како 2010 TK7. На 12 декември 2020 година, научниците забележале интригантен објект.
Раните набљудувања сугерираа дека станува збор за друг „тројанец“, но беше тешко да се потврди, бидејќи не беше можно со сигурност да се знае каде отишла неговата орбита.
Истражувачите сега детално ја опишаа оваа орбита со комбинирање на податоците од архивите со набљудувањата направени од Земјата. Ова дело потврдува дека објектот е всушност „тројанец“, како што се мислеше.
Сè уште не е јасно од каде точно дошол. Една од претпоставките е дека тој го започнал својот живот во главниот астероиден појас понатаму во Сончевиот Систем, а бил исфрлен кога стапил во интеракција со гравитацијата на Јупитер.
Иако не знаат од каде потекнува, научниците знаат каде оди објектот. Набљудувањата сугерираат дека ќе остане во сегашната орбита уште 4.000 години.
Исто така, се чини дека е астероид од типот C-комплекс, кој главно се состои од јаглерод. Новиот астероид, познат како 2020 KSL5, е исто така поголем од неговиот претходник, што овозможува пристап до него со помалку потребно гориво.
„Затоа, овие објекти можат да станат идеални места за вселенски мисии и, во иднина, за населување на човечки бази или за инсталирање на научен хардвер што ќе има корист од нивната посебна локација“, пишуваат авторите.
Тие детално го опишуваат истражувањето во новата студија: „Анализа на стабилноста на орбитата и фотометриска карактеризација на вториот тројански астероид на Земјата 2020 KSL5“, објавена во Nature Communications.
