Научниците предупредија дека Арктикот, со постојните последици од климатските промени, има нов проблем - ѓубрето кое доаѓа со зголемениот поморски сообраќај низ регионот.
Арктикот се загрева двојно побрзо од остатокот од светот, па така топењето на мразот што долго ја покрива областа отвора нови морски патишта. Минатата година, истражувачите забележаа дека ѓубрето ги затрупува плажите на Беринговиот Теснец во близина на Алјаска.
„Тоа е директен резултат на зголемената поморска активност“, рече климатологот Рик Томан од климатскиот центар на Алјаска, еден од главните уредници на извештајот за Арктикот што го објавува годишно државната агенција NOAA.
Отпадот покажува „што климатските промени им овозможуваат на луѓето да прават во регионот“, рече Томан.
Најчестиот јазик на пакувањата фрлени производи пронајдени во Беринговиот Теснец е рускиот, тврди NOAA.
Помеѓу 2016 и 2019 година, бројот на рибарски, товарни и воени бродови што минуваат низ регионот порасна за 58 отсто, а експертите велат дека сообраќајот ќе продолжи да расте паралелно со глобалното затоплување.
Со превозот доаѓа и бучавата. Подводните звучни слики на Арктикот станаа побучни, проблем за морските цицачи кои користат звук за навигација и социјализација, предупредува Томан.
Годишниот извештај, објавен на конференцијата на Американската геофизичка унија, зборува и за најниското ниво на мраз во пролетта оваа година, што е уште еден знак дека климатските промени брзо го менуваат Арктикот.
„Луѓето на Арктикот веќе доживуваат огромни промени“, изјави коавторката на извештајот Ана Лилједал.