Сте биле во природа, сте набрале лековити билки и логично, наредниот чекор е да ги исушите за ги сочувате за зимата која е пред нас.
Иако на многумина им се чини дека тоа е навистина едноставно, сепак постојат правила кои мора да се почитуваат.
Оние поискусните билкари советуваат дека растенијата не треба да се мијат пред сушење, а со сушењето треба да почнете што побрзо откако ќе ги наберите бидејќи преку стоењето можат да изгубат од вредните активни супстанци.
Цветовите, листовите и останатите делови треба да се сушат цели, а дури потоа може да се ситнат - непосредно пред користење. Кога сушите корен, него сепак треба претходно да го подготвите, па затоа задолжително исечкајте го, а кога ќе се исуши истолчете го пред употреба.
Наједноставен начин на сушење е да постелите чиста хартиена крпа на која ќе ги распоредите сите билки и и ќе оставите да се исушат. Сепак, најдобриот начин за сушење е на ладно и на промаја, а не на директна сончева светлина. Нашите баби порано лековитите билки ги ставале на конец и ги сушеле над печките или на поткровјето. Во таков случај, стебленцата од билките врзете ги со конец и обесете ги однопаку, но да не бидат прегусти бидејќи помеѓу билките треба да циркулира воздух.
