Бразилскиот фудбалер Нејмар изјави дека не може да гарантира оти повторно ќе настапи за својата репрезентација, откако Бразил синоќа беше елиминиран од Хрватска на пенали во четвртфиналето на Светското првенство во Катар.
„Не гарантирам 100% дека ќе се вратам во бразилската репрезентација. Морам да анализирам, уште малку да размислам што е добро за мене и за репрезентацијата“, рече 30-годишниот напаѓач на ПСЖ.
Бразил, кој беше меѓу главните фаворити за освојување на светската титула, го заврши настапот на Мундијалот со елиминација од Хрватска по изведување пенали, откако натпреварот по 120 минути игра заврши 1:1. Нејмар не стигна на ред да шутира пенал.
Нејмар за Бразил има одиграно 124 натпревари на кои постигна 77 голови, со што е најдобар стрелец во историјата на Бразил зеадно со Пеле. На наредниот Мундијал, кој во 2026 година ќе се игра во Канада, САД и Мексико, Нејмар ќе има 34 години. Овој во Катар беше негов трет откако во 2010 тогашниот селектор Дунга одлучи да не го повика и покрај притисокот од јавноста и од легендите како Пеле и Ромарио.