Откако претседателот на САД Доналд Трамп официјално ја презеде должноста, сам се пресели во Белата куќа во Вашингтон. Неговата сопруга Меланија остана во нивниот дом во Њујорк, што беше преседан во историјата на САД.
Според американските медиуми, поранешната манекенка со словенечко потекло ќе му се придружи на сопругот во Белата куќа неделава. Меланија остана да живее во Trump Tower со синот Барон додека тој да ја заврши школската година.
Источното крило на официјалната претседателска резиденција е подготвено за првата дама на САД: на преуредувањето работеше дизајнерот на ентериер Там Каналикам кој по потекло е од Лаос.
„Планот е да се пресели во јуни, како што беше планирано и досега, но немаме одредено датум“, рече нејзината портпаролка за односи со јавноста Стефани Гришам.
Ова беше прв случај во историјата на САД првата дама да го остави претседателот сам да се всели во Белата куќа. Нејзиното доаѓање во Вашингтон се смета дека ќе придонесе кон подобрување на нејзиниот имиџ како прва дама согласно американската традиција.
Доаѓањето на Меланија, според медиумите, сепак се смета дека нема да придонесе кон почесто појавување на првата дама во јавноста, со оглед на тоа дека таа своеволно се повлече од јавниот живот и го придружуваше сопругот само на функции каде што мораше, како неговото прво патување во странство.
И тој случај помина неславно, имајќи предвид дека имаше мал скандал околу нивниот меѓусебен однос и нејзиното одбивање да го држи претседателот за рака.
„Меланија остава впечаток дека не е заинтересирана за активностите и задолженијата на првата дама“, вели авторката Џенифер Вајнер во нејзиниот коментар за New York Times.
Во нејзиниот говор во предизборната кампања, Меланија Трамп рече дека сака да се вклучи во борбата против злоставување деца, особено преку интернет, но не кажа повеќе детали.