Според досегашните информации на Министерството за надворешни работи, во силниот земјотрес што ги погоди Турција и Грција нема повредени македонски државјани.
„Во согласност со официјалните информации од надлежните турски и грчки органи, засега немаме сознанија за повредени македонски граѓани, воедно ниту еден македонски државјанин не се обратил за информација или помош“, соопшти МНР.
Според информациите што ги објави Агенцијата за управување со кризи на Република Турција (АФАД), ноќеска, неколку минути по полноќ, во заливот Гокова (провинцијата Мугла), каде што се наоѓа туристичкиот град Бодрум, местото го зафатиле серија од над 45 земјотреси, од кои најсилниот бил со јачина од 6,3 степени според Рихтер.
Епицентарот на земјотресот бил во непосредна близина на турскиот град Бодрум и грчкиот остров Кос. Според досегашните сознанија, на грчкиот остров Кос има две жртви, истовремено има и повеќе повредени, а воедно земјотресот предизвикал сериозна материјална штета.
За сите информации поврзани со безбедноста на македонските граѓани кои во моментот се наоѓаат во Република Турција и Грција активни се следниве телефонски линии:
Амбасада на Република Македонија во Анкара
Фиксни телефони: + 903 12 439 92 04 ; + 903 12 439 92 08
Мобилни телефони: +905303395884; +905385466691
Канцеларија за врски на Република Македонија во Атина
Фиксен телефон: +30 210 67 49 585
Мобилен телефон: +30 694 501 39 50