Веќе долго време се прашуваме: Кој е Бенкси? Одговорот како цело време да ни е под нос, но никогаш не успеавме да го дознаеме вистинскиот идентитет. Дали Бенкси е еден човек или цело движење? Дали е Британец, Американец или којзнае што друго?
Еден неодамна откриен телевизиски прилог од 2003 година, кој деновиве се појави низ интернет брановите, содржи интервју во кое мистериозен графити-уметник тврди дека тој е Бенкси.
Прилогот го прави телевизијата ITV, а во него е опфатена изложбата која е позната под името Turf War. Еден од соговорниците на новинарот Хег Гордон е човек кој се нарекува себеси Бенкси и за време на прилогот тој црта стенсил (графит направен со шаблон) од инсект, а подоцна и бебе со цитатот „Kill more“. Она што е интересно е дека овие два дизајни уште одамна му се припишуваат на артистот кој денес го знаеме како Бенкси.
„Не може да си графити артист и да излезеш во јавност со твоето лице – тие две работи не одат една со друга“, изјави тогаш артистот кој се претставува со името Бенкси.
Шеснаесет години подоцна, новинарот Гордон кој разговараше со мистериозниот човек, вели дека не може да се сети како изгледал артистот кој потенцијално се крие зад името Бенкси, за кој денес се распрашуваат милиони луѓе низ светот.
„Го видов неговото лице ама не можам да се сетам како изгледаше. Нели е тоа тажно?“, изјави Гордон.
Претставниците на Бенкси одбија да го коментираат видеото и содржината објавена од ITV.
Бенкси е псевдоним на мистериозниот уметник кој своите дела ги остава насекаде низ светот, а тие најчесто имаат политичка и социјална природа и го отсликуваат ставот на широката народна маса, односно му даваат глас на народот преку „уметнички дела“, како што ги нарекува артистот.
