Новата серија на Netflix насловена Tiny Petty Things наиде на критики од многу гледачи дека има „безобразно непотребни секс-сцени“.
Приказната во тинејџерската драма ја следи Невеа, елитна балерина на која ѝ се нуди посакувана позиција во Балетската академија во Чикаго – по убиството на главната ѕвезда на ансамблот.
Во секоја епизода се дознаваат сѐ повеќе и повеќе мрачни тајни за балетското училиште и врсниците на Невеа, но гледачите тврдат дека биле збунети од бројните сцени со секс и голотија, па не можеле да се сконцентрираат на мистеријата.
И реакциите на критичарите се поделени (а серијата не помина баш најдобро ни на IMDb), а некои им препорачаа на гледачите на Netflix едноставно „да ја прескокнат“.
Британски Guardian, пак, имаше сосема блага рецензија, во која серијата ја нарече „забавна“ и со „мрачен модерен пресврт“. Сепак препораката е дека може „да ги премотате сегментите со танцување и нарација и пак ќе бидете во тек со гледањето“.
Реакциите на социјалните мрежи главно се поврзани со прекумерната голотија, особено ако се земе предвид дека серијата е за тинејџери. „Безобразно непотребни секс-сцени“ е еден од најчестите коментари, а други се изненадени дека „до втората епизода ги видовме речиси сите ликови голи“. Најголема причина за загриженост е сексуализирањето на тинејџерите, што не е реткост во тинејџерски серии, иако постојано се укажува на овој проблем во индустријата..
