Фудбалерите на Реал го освоија Светското клупско првенство откако синоќа во финалето одиграно на стадионот Мулај Абдалах во Рабат го совладаа Ал Хилал со 5:3.
Реал тргна жестоко од самиот старт на натпреварот, а Винисиус Жуниор навести дека е одлично расположен со голот во 13. минута по одличното проигрување на Бензема.
Само пет минути подоцна, Валверде силно шутна по една одбиена топка и го удвои водството, а на паузата беше 2:1, бидејќи Марега постигна гол од контранапад.
Тринаесет минути игра во продолжението беа доволни за Реал да постигне уште два гола. Најпрво Винисиус мајсторски му асистираше на Бензема, кој само ја испрати топката во мрежата, а потоа Валверде одигра двојно двојно додавање со Карвахал за да го постигне својот втор гол на натпреварот.
Пет минути подоцна од уште еден контранапад Ал-Хилал со гол на Вието ја намали резултатската разлика, а потоа за 5:2 повторно погоди Винисиус Жуниор. Претходно, Себаљос направи сè, а потоа Бразилецот ја зеде топката и го матираше голманот за петтиот гол на Реал.
Конечните 5:3 ги постигна одличниот Вието откако Ал-Хилал ја искористи несериозноста и непромисленоста на Реал.
Шпанскиот клуб на тој начин стигна до осмата титула клупски светски шампион, вкупно петта откако се одржува во форматот на Светското клупско првенство со клубови од сите континенти.
Со освојувањето на Светското клупско првенство, Реал Мадрид дојде до бројка од 100 титули на официјални натпреварувања, и стана прв клуб во светот што успеал во тоа.
Реал е рекордер по бројот на титули во Лигата на шампионите, шпанската лига, Светското клупско првенство, а има трофеи и во многу други натпреварувања во кои учествувал, па синоќа славеа голем јубилеј, 100 победнички пехари во пребогатата клупска историја.
Рекорди поставија и Тони Крос кој е прв со шест титули на светско клупско, и Карим Бензема кој дојде до 32-ри трофеј во кариерата и сега е најтрофеен Французин.
Флорентино Перес има 31 титула како претседател на Реал, а Карло Анчелоти е третиот тренер кој има три титули на светско клупско.
