Вицепремиерот за борба против корупцијата и криминал, одржлив развој и човечки ресурси Љупчо Николовски денеска поднесе писмена оставка од функцијата генерален секретар на СДСМ.
Тој изрази посебна благодарност до поранешниот претседател на СДСМ, Зоран Заев и до сите членови на партијата.
-Денес СДСМ е најбројната, најмодерната, дигитализирана, динамична и европска партија. По 18 години, СДСМ и коалицијата победија на парламентарни избори минатата година. На претседателот Ковачевски и новото раководство им посакувам многу мудрост, единство, ангажман и чување на вредностите. Со ова оставам можност за избор на нов генерален секретар согласно концептот на претседателот Ковачевски, стои меѓу другото во писмената оставка на Николовски доставена до СДСМ.
Претходно и министерот за внатрешни работи Оливер Спасовски се повлече од функцијата потпретседател на партијата, најавувајќи дека нема намера да биде дел од новото раководство.
Централниот одбор на СДСМ вечерва на седница треба да ги донесе финалните одлуки за тоа како ќе изгледа новото раководство на партијата.
