Фудбалерите на Интер Мајами без Лионел Меси останаа без трофејот во Купот на САД. Во финалето на американскиот УС Опен Куп, Интер беше поразен од Хјустон Динамо со резултат 2:1.
Меси поради повреда не можеше да настапи на синоќешниот меч, а тренерот Херардо Мартино поради истата причина не можеше да смета на Жорди Алба, па Серхио Бускетс беше единствената ѕвезда на Интер на теренот.
Динамо одлично влезе во натпреварот и поведе во 24. минута со голот на Грифин Дорси, а девет минути подоцна Амине Баси од пенал зголеми на 2:0. Конечните 2:1 ги постави Јозеф Мартинез во последните минути од играта.
Ова беше втор трофеј за Хјустон Динамо во најстарото натпреварување во Соединетите Американски Држави кое првпат се играше пред 110 години.
