Италијански еколошки активисти денеска испрскаа супа врз заштитното стакло зад кое е изложена слика на холандскиот уметник Винсент ван Гог во Рим.
Уметничкото дело не е оштетено, а акцијата е начин да се привлече вниманието на јавноста против употребата на фосилни горива и климатските промени.
Четворица активисти на италијанската група Ultima generazione (Последната генерација) ја испрскаа сликата „Сејачот и зајдисонцето“ на Ван Гог од 1888 година, изложена во Рим како дел од изложбата посветена на тој холандски уметник.
Подоцна, групата напиша на Twitter дека нејзината акција е „очајнички и научно заснован крик што не може да се поистоветува со едноставен вандализам“.
– Ненасилните директни акции ќе продолжат сѐ додека граѓаните не добијат одговори од нивните влади на нивните барања да се запре употребата на нафта, гас и на јаглен и да се инвестира во обновливи извори на енергија, соопшти организацијата.
Италијанските власти одговорија дека нападот врз уметноста е одвратен чин кој мора најостро да се осуди.
Слични акции спроведоа во неколку наврати и еколошки активисти во Обединетото Кралство, Германија и Холандија.