Во Велика Британија е откриен уште еден нов сој на коронавирус, изјави министерот за здравство Мет Хенкок, а новиот сој е потврден и во Израел кај неколку патници кои пристигнале од Велика Британија.
„Откривме два случаи на новиот сој тука во Велика Британија“, изјави Хенкок пред новинарите.
Тој додаде дека во двата случаи станува збор за контакти на луѓе кои пристигнале од Јужна Африка во изминатите неколку недели.
„Овој нов сој многу нè загрижува бидејќи е полесен за пренесување и се чини дека мутирал во споредба со (првиот) нов сој што беше откриен преетходно“, рече министерот.
Премиерот Борис Џонсон и неговите советници во саботата известија за нов сој на коронавирус, кој може да биде за 70% позаразен и брзо да се шири низ Велика Британија, иако не се смета за поубиствен или опасен за развој на потешка форма на болеста COVID-19.
Написите за мутираниот вид од Англија неделава предизвикаа претпразнични затворања и принудија десетици земји да ги затворат своите граници со Велика Британија.
Италија, нацијата со најмногу смртни случаи во Европа, во неделата идентификуваше пациент заразен со новиот сој на коронавирус, како и Данска и Франција.
Европските земји размислуваат за проверки на патниците на летовите од Велика Британија и да воведат задолжителен карантин за патниците по пристигнувањето.