Сириската државна телевизија пренесе дека сириската противвоздушна одбрана одговорила на нов воздушен напад над сирискиот регион Хомс, кој имал за цел да ја погоди воздухопловната база Шајрат.
Пентагон соопшти дека во таа област во тоа време немало американски воени активности.
Сириските медиуми не прецизираа кој би можел да стои зад овој ракетен напад.
На прашањето околу информациите за ракетниот напад на воздухопловната база Шајрат во сирискиот регион Хомс, Пентагон соопшти:
„Немаше воени активности од страна на САД во тоа време“.
Оваа информација е објавена три дена после нападите на западните сили во Сирија, после обвиненијата дека силите на претседателот Башар ел Асад користеле хемиско оружје во Дума.
Експерти од меѓународната организација за забрана на хемиско оружје (OPCW), кои во саботата отворија истрага околу евентуалната употреба на такво оружје во Сирија, соопштија дека утре ќе ја посетат Дума за продолжување на истрагата.
Русија, која се обврза да ја обезбеди таа мисија во Дума, соопшти дека дошло до доцнење при заминување на терен од безбедносни причини, бидејќи на патиштата имало мина која била отстранета.
Портпаролот на Кремљ, Димитриј Песков, изјави дека Русија не сака да ја загрози работата на експертите на OPCW, како што тоа од порано го соопштија британските власти.