Боксинг деј не почна добро за милијардерите од Њукасл откако на отворањето попладнево со пресврт загубија дома од Нотингем Форест.
А, сѐ добро почна за Њукасл. Во 23. минута поведе со 1:0 преку Александер Исак од белата точка откако Ола Аина фаулираше во шестнаесетникот.
Кога сите мислеа дека со тој резултат ќе се замине на пауза, на сцена стапи напаѓачот од Нов Зеланд, Крис Вуд, кој во надополнувањето погоди за 1:1 на асистенција на Ентони Еланга.
По паузата следуваше вистински шок на „Сент Џејмс' Парк“ - Вуд продолжи да погодува. Најпрво во 53. минута по нова асистенција од Еланга се погрижи за пресврт и водство на гостите, за во 60-тата и трет пат да погоди за веќе големо водство на тимот од Вест Бриџфорд.
Да биде работата уште поинтересна, Крис Вуд беше едно од првите засилувања за Њукасл кога го доби новиот сопственик тешкаш. Вуд во Њукасл дојде во јануари 2021 година од Барнли, но за една година постигна едвај 4 гола во 35 премиерлигашки натпревари. На полусезона лани се пресели во Нотингем Форест, а денеска на својот поранешен клуб му даде хет-трик.
32-годишниот Вуд за репрезентацијата на Нов Зеланд има одиграно 74 натпревари и постигнато 34 голови. Како 18-годишник заигра на Мундијалот 2010 во Јужна Африка, а боите на својата репрезентација ги бранеше и на ЛОИ во 2012 и 2020.