Нуркачи од Белград во близина на островот Вис открија брод кој потонал при невреме во моментот кога пренесувал муниција за боево оружје. За мистеријата да биде уште поголема, неговото потонување било означено како „воена тајна“.
Тимот нуркачи од белградскиот нуркачки клуб Тритон предводен од Мирко Бевења откритието го направил на 8 октомври годинава во Јадранското Море на длабочина од 125 метри и оддалеченост од 9 наутички милји од Рогозница во Далмација, Хрватска.
Преку анализа на ексклузивните снимки кои Бевења ги направил при нуркањето, тој и неговиот тим откриле дека станува збор за воен брод на ЈНА - десантниот носач на тенкови и поставувач на мини DTM 223, кој потонал во 1976 година. Произведен бил во 1950 година во Риека со долшина од 49,8 метри и ширина од 9 метри. Можел да носи три тенка, или три камиони, како и 200 војници.
Само ден подоцна истиот тим на Тритон наишол на уште едно големо откритие и тоа американскиот бомбардер B24 од Втората свертска војна, на длабочина од 115 метри.
Интересно е што Југословенската народна армија поседувала околу 30 носачи на тенкови, од кои секој можел да пренесе по три тенка. Конкретно, овој брод откриен кај Вис потонал при силно невреме, а сите 25 членови на екипажот биле спасени од трговски брод кој се одзвал на повикот за помош.
Целиот случај набрзо бил означен како воена тајна, по што неговата судбина заминала во заборав, сѐ до откривањето од српскиот нуркачки клуб Тритон.
