Поранешните претседатели на САД Барак Обама, Џорџ В. Буш и Бил Клинтон доброволно се пријавија да примат вакцина против COVID-19 пред камера за да ја зголемат довербата на јавноста во безбедноста на вакцината, откако американската Администрација за храна и лекови ќе ја одобри.
Тројцата најскорешни поранешни претседатели се надеваат дека кампањата за подигнување на свеста за подобрување на довербата во нејзината безбедност и ефикасност ќе испрати моќна порака.
Фреди Форд, шефот на кабинетот на Буш, за CNN изјави дека 43-тиот претседател се обратил до д-р Ентони Фаучи - директор на Националниот институт за алергии и инфективни болести и врвен експерт за заразни болести во САД - и д-р Дебора Бирк, координаторот за одговор на коронавирусите во Белата куќа, за да види како тој може да помогне во промовирање на вакцината.
„Пред неколку недели претседателот Буш ме замоли да им соопштам на д-р Фаучи и д-р Биркс дека, кога ќе дојде време, тој сака да направи што може за да помогне во охрабрувањето на неговите сограѓани да се вакцинираат“, изјави Форд за CNN.
„Прво, вакцините треба да се сметаат за безбедни и да се дадат на приоритетните популации. Потоа, претседателот Буш ќе застане во ред за да ја чека неговата и со задоволство ќе го стори тоа пред камера.“
И Бил Клинтон би бил подготвен да ја прими вакцината јавно, со цел да ја промовира, рече неговиот прес секретар.
„Претседателот Клинтон дефинитивно ќе ја прими вакцината штом ќе му биде достапна, врз основа на приоритетите утврдени од здравствените служби. И тој ќе го направи тоа јавно, ако со тоа помогне сите Американци да го сторат истото“, рече Анхел Урена.
Обама, во интервју со водителот на SiriusXM Џо Медисон, рече дека ако Фаучи рече дека вакцината за коронавирус е безбедна, тој ќе му верува.
„На луѓето како Ентони Фаучи, кого го познавам и со кој работев, им верувам во целост“, рече Обама.
„Значи, ако Ентони Фаучи ми рече дека оваа вакцина е безбедна и може да се вакцинирам за да не добијам КОВИД, апсолутно да, ќе ја примам“.
„Ви ветувам дека откако вакцината ќе стане достапна за луѓето кои не спаѓаат во ризични групи, ќе се вакцинирам“, рече Обама.
„Можеби ќе го направам тоа во живо на ТВ или ќе се снимам, само за да знаат луѓето дека верувам во оваа наука“.
