На интернет се појави видео на кое маж со маска и самострел се заканува дека ќе ја убие британската кралица.
Се верува дека станува збор за 19-годишниот маж кој бил приведен од полицијата во замокот Виндзор на Божик. Неговото име е Џасвант Синг Чаил.
Снимката ја испратил на пријатели преку Snapchat половина час пред да биде уапсен од вооружената полиција на 25 декември утрото. Бил на 500 метри од приватниот апартман на кралицата, внатре во замокот. Вооружен со самострел, се искачил на скала од јаже преку оградата на замокот. Кралицата во тој момент појадувала и била информирана за провалата.
„Жал ми е. Жал ми е за она што го направив и она што ќе го направам“
Чаил е снимен облечен во дуксер со качулка, држи црно оружје и ѝ се обраќа на камерата со компјутерски изменет глас. Лицето му го покрива бела маска инспирирана од Star Wars, а неговите зборови укажуваат на познатиот филмски серијал. Еве што рече Чаил:
„Жал ми е. Жал ми е за она што го направив и она што ќе го направам. Ќе се обидам да ја убијам Елизабета, кралицата на кралското семејство. Ова е одмазда за убиените во масакрот во Џалијанвал Баг во 1919 година. Исто така ова е одмазда за оние кои убиваа, понижуваа и дискриминираа поради нивната раса. Јас сум Индиски Сик, Сит. Јас се викам Џасвант Синг Чаил, сега се викам Дарт Џонс“.
Напаѓачот е неспособен за судење
Во „Војна на ѕвездите“, Ситите се непријатели на џедаите и ѝ служат на темната страна на Силата. Масакрот во Џалијанвал Баг се случи во Индија во 1919 година, кога британските колонијални трупи убиле меѓу 380 и 1.000 мирни демонстранти и раниле уште 1.200 луѓе.
Чаил е кривично гонет според Законот за ментално здравје, откако лекарите го прогласија за неспособен за судење.