Иако снегот беше најавен и се очекуваше, сепак создаде хаос во престолнината на нашиот северен сосед.
Снегот кој од ноќеска паѓа во Белград во комбинација со утринскиот сообраќаен шпиц создаде хаос низ улиците на српскиот главен град, пренесуваат тамошните медиуми. Метеоролозите најавуваат дека ќе падне вкупно 20 сантиметри снег, а на повисоките делови од градот и до 30.
На многу главни улици и раскрсници автомобилите лазат. Голем застој настана на плоштадот „Славија“ каде останаа блокирани и трамваите. Долги колони се забележани и од бул. „Краља Александра“ па сѐ до Вуков споменик во стариот дел. Блокиран е и делот околу Београдско сајмиште, каде автомобилите едвај се движат.
Снегот создаде проблеми и на автопатот Белград-Ниш во делот од Нови Београд кон излезот од градот.
Пријавени се и неколку сообраќајки, меѓу кои и превртен камионн, како и паднати дрвја кои дополнително го попречуваат нормалниот проток на возила.
На Вождовац 6-7 автобуси останале блокирани на улица откако снегот ги фатил неподготвени, со летни гуми.
„Кога зборуваме за априлските снегови, од почетокот на метеролошките мерења во последните 150 години немаме забележано ваква количина на снег. Ова е невообичаена појава за април, да се случеше во декември или јануари немаше да биде необично. Во април снег се формира еднаш во десет години“, вели српскиот метеоролог Слободан Совиљ за Kurir.
Снегот интензивно паѓа и во други делови на Србија.