Шведскиот репрезентативец Кристофер Олсон е хоспитализиран и ставен е во вештачка кома поради неидентификувана болест на мозокот, објави неговиот клуб Митјиланд.
„Кристофер Олсон боледува од навидум акутно заболување на мозокот кое не е резултат на некоја самонанесена повреда или надворешни фактори“, се вели во соопштението на данскиот клуб.
Клубот мораше да се огласи за да стави крај на шпекулациите поттикнати од отсуството на фудбалерот.
„Шведскиот репрезентативец изгуби свест во својот дом во вторник на 20 февруари и беше префрлен во Универзитетската болница во Архус, каде беше хоспитализиран и ставен на респиратор“, се вели во соопштението на клубот.
Откако ја започна својата кариера во Арсенал, 28-годишниот Олсон од Норшепињ играше за Митјиланд и АИК, потоа Краснодар и Андерлехт, пред минатото лето повторно да му се приклучи на Митјиланд.
Играчот од средниот ред за Шведска има 47 натпревари без постигнат гол. Беше дел од тимот што настапи на ЕУРО 2020.
