Градоначалникот Андреј Жерновски, заедно со претставници на општина Центар, ја посетија населбата Мало Курило, на Водно, каде имаше неколку погодени куќи од поплавите.
Жителите се благодарни за неодамнешното чистење на каналот, кој цели 40 години бил запоставен и полн со шут и ѓубре.
„Ако каналот беше нечист, ќе поминевме многу лошо и ние, но и населбите Капиштец и Козле, кои се подолу. Пред да се исчисти каналот, при помали дождови водата се излеваше, не сакам ни да помислам што ќе се случеше сега. Голема среќа што вака се заврши цела работа со минимални штети “, вели жителка на Мало Курило.
Од овој канал беа извадени преку 30 тони ѓубре и шут во акцијата која ја организираше општината пред неколку месеци. Оваа мала населба со години била запоставена од општинските служби на Центар, но во последниот период ситуацијата е променета.
„Предолго време овие далечни делови од Центар беа запоставени од општинските власти, но ние тоа го променивме. Се планираат нови прокети во оваа населба и целосно реконструирање на главната улица „Загрепска“, изјави Жерновски.
Општината во текот на оваа недела врши процена на штетите во домовите на граѓаните на Центар. Се санираат штетите во ОУ „Кочо Рацин", но најголем дел од механизацијата и службите во моментов работат во погодените подрачја и го поддржуваат Централниот кризен штаб за санирање на штетите, велат од општината.
